Monte do Castro en 100 minutos

Paseo polo miradoiro de Vigo en menos de 2 horas

O monte do Castro ofrece un dos paseos con mellores vistas de Vigo á ría en menos de 2 horas. O Castro é o maior parque do centro da cidade e é, xunto co parque de Castrelos, o seu auténtico pulmón, a un paso das rúas máis comerciais e as zonas administrativas ou residenciais. Ao longo dos sendeiros do Castro gozaremos deste  parque botánico, da súa historia e as súas incribles vistas.

O paseo comeza no máis alto do monte, xusto no centro da fortaleza que o coroa, unhas murallas do século XVII que hoxe son o mellor miradoiro de Vigo e a ría. Estas murallas acollen un xardín salpicado de esculturas como o monumento a Vigo de Camilo Nogueira ou a homenaxe ao poeta medieval Martín Códax.

Descendendo polos sendeiros que bordean a fortificación do Castro en dirección ao barrio histórico desembocaremos nun novo miradoiro, presidido este polo Monumento aos galeóns de Rande: tres áncoras e varios canóns recuperados do fondo da ría. Son algúns dos restos da batalla de Rande que en 1702 afundiu boa parte da flota española que chegaba de América cargada de ouro e prata. Se os seus tesouros non foron atopados polo Capitán Nemo, como novelou Jules Verne, talvez aínda estean no fondo do mar.

Desde o monumento á batalla de Rande, e atravesando a diversidade de especies vexetais que poboan o monte, podemos ir cara á esquerda ata atoparnos cos restos arqueolóxicos dos primeiros habitantes de Vigo: vivendas circulares de pedra dun poboado castrexo do século II antes de Cristo que dá nome ao monte.

Se volvemos sobre os nosos pasos e, desde o monumento á batalla de Rande, seguimos descendendo en dirección ao centro histórico, atoparémonos coa torre do Concello. Xusto tras el, están os restos da fortaleza de San Sebastián, a outra gran defensa da cidade xunto coa fortificación do Castro.

Pistas e recomendacións: 

No alto do monte hai unha cafetaría na que poder descansar gozando das súas vistas, ideais para tomar un aperitivo antes de comer.

Galería de imaxes: 
Turismo de Vigo
Turismo de Vigo
Turismo de Vigo
Turismo de Vigo

Información práctica

Distancia: menos de 2 quilómetros.

Duración do percorrido: algo máis dunha hora e media con paradas.

Dificultade: media.

Tipo de ruta: non circular.