ROMANO POR UN DÍA ... NA VILA ROMANA DE TORALLA!
xoves, 9 Xullo 2026
A Villa Romana de Toralla, situada xunto á praia do Vao, é a única vila romana de Galicia escavada na súa totalidade e aberta ás visitas. Data dos séculos IV e V d.C. e conserva a vivenda dos propietarios, da súa familia e do servizo, así como unhas salinas nas que se producía sal mariña destinada ao comercio.
Trátase dun conxunto arqueolóxico único e de gran importancia, situado na antiga finca privada da familia Mirambell, que descubriu o xacemento e o doou á cidade.
A visita á Villa Romana resulta especialmente atractiva durante os meses de xullo e agosto, tanto pola beleza da súa contorna como polas visitas guiadas teatralizadas, que trasladan ao público á Antiga Roma.
Goza de escenas cheas de historia e emoción: vodas tradicionais, elaboración de perfumes, danzas, oficios da época e o espectacular combate de gladiadores.
Datas: 16, 23 e 30 de xullo; 6,13 e 20 de agosto.
Dúas sesións cada día: ás 20:00 e ás 21:00 h.
Entrada gratuíta ata completar a capacidade (+info: 010).